Ayətullah Mahmud Rəcəbi Hövzə Xəbər Agentliyinin müxbirinə verdiyi müsahibəsində İslam İnqilabının Ali Məqamlı Rəhbərinin "Müqəddəs Müdafiə Həftəsi" münasibətilə yayımladığı müraciətə toxunaraq bildirib ki, həmin müraciətdə “ilahi hesablamalara əsasən, İran dünyanın böyük güclərindən biridir ” fikri xüsusi vurğulanıb.
O, bu barədə fikirlərini açıqlayaraq qeyd edib: Bizim dini və Quran təlimlərinə əsaslanan baxışımıza görə, qələbənin əldə olunmasında və qüdrətin formalaşmasında rol oynayan maddi amillərdən daha üstün amillər də mövcuddur. Bu amillərin təsirini, xüsusilə də dünyada aydın şəkildə müşahidə edirik. Qurani-Kərimin ayələrində geniş şəkildə bəhs edilən ilahi yardımlar buna bariz nümunədir. Son iki məcburi müharibə zamanı da İran xalqının ABŞ və sionist düşmənlə qarşıdurmasında uca Allahın yardımını bilavasitə müşahidə etdik.
Etiqadi baxış kontekstində ilahi yardım
Ekspertlər Məclisinin Rəyasət Heyətinin üzvü əlavə edib: Bunlar uca Allahın dəyişməz qaydalarındandır. Biz öyrənmişik ki, əgər Allaha və onun dininə yardım etsək, ilahi yardım bizə də şamil olacaq.
Elmi Hövzələrin Ali Şurasının üzvü sözlərinə davam edərək bildirib: Hər şeyi yalnız maddi amillərlə məhdudlaşdıran sırf dünyəvi baxışdan fərqli olaraq dini və ilahi dünyagörüşündə maddi amillərlə yanaşı fövqəltəbii amillər də mühüm rol oynayır. Bu məsələyə konkret nümunə olaraq Qurani-Kərimin nurani ayələri əsasında həzrət Peyğəmbərin (s) və digər ilahi peyğəmbərlərin həyatına nəzər sala bilərik. Qurani-Kərimin ayələri bu həqiqəti aydın şəkildə ortaya qoyur. Maddi imkanları və hərbi potensialı baxımından zəif olan bir qüvvə özündən qat-qat üstün hərbi imkanlara malik düşmənləri üzərində qələbə qazanmışdır. Ayələrə nəzər saldıqda görürük ki, bəzi hallarda həzrət Peyğəmbərin (s) qoşununun sayı düşmən qoşununun sayının yarısı, hətta üçdə biri qədər olmuşdur. Buna baxmayaraq, ilahi izn və yardım sayəsində qələbə qazanılmış, müxtəlif müharibələrdə möminlərə Allah-Taalanın yardımı nəsib olmuşdur.
Nə üçün İslam İnqilabının Ali Məqamlı Rəhbəri İran İslam Respublikasının dünyada böyük gücə sahib olduğunu bəyan edib?
Ayətullah Rəcəbi bildirib: Digər tərəfdən, nəzərə almaq lazımdır ki, Qurani-Kərim maddi amillərin özlərini də uca Allahın hakimiyyəti altında olan amillər kimi təqdim edir. Çünki onların hamısı Allahın yaratdıqlarıdır. Buna görə də Allah-Taalanın bütün amillər üzərində hökmranlığı mübahisəsiz və qəti bir həqiqətdir. Necə ki, bu məsələyə “Ayətül-kürsi” ayəsində də işarə olunur”.
İmam Xomeyni (r) adına Təlim və Tədqiqat İnstitutunun direktoru sözünə davam edərək qeyd edib: İslam İnqilabının qələbəsindən sonrakı ilk illərdə baş vermiş "Təbəs" hadisəsinə, eləcə də sonuncu məcburi müharibə zamanı düşmənin İran ərazisinə, o cümlədən İsfahan ətrafına müdaxiləsinə nəzər saldıqda, bunun Amerika qüvvələrinin rüsvayçılığı ilə nəticələndiyini aydın şəkildə görürük. Bu hadisələr baş verənlərin uca Allahın yardımı və lütfündən qaynaqlandığını açıq şəkildə göstərir. İslam İnqilabının Ali Məqamlı Rəhbərinin İranın dünyanın böyük güclərindən biri olduğunu bəyan etməsi də məhz bu ilahi hesablamalara əsaslanır.
Heç bir qüvvə ilahi qüdrətə qalib gəlmək iqtidarında deyil
Elmi Hövzələrin Ali Şurasının üzvü sözlərinə davam edərək bildirib: Uca Allah bir xalqın qələbə və zəfərini iradə etdiyi zaman heç bir amil onun iradəsinin qarşısını ala bilməz. Buna görə də belə bir qüdrət bütün digər qüvvələrə qalib gəlir və qələbə qazanır.
Ayətullah Rəcəbi əlavə edib: Ayətullah Seyid Müctəba Xameneinin buyurduğu kimi, əgər diqqətimizi uca Allaha yönəltsək və məsumlara (ə) təvəssül etsək, güclü bir dayağa malik olarıq. Bu əsasda, ilahi olmayan bütün qüvvələrə qalib gələrək dünyada tayı-bərabəri olmayan yeganə fövqəldövlətə çevrilərik.
Allaha təvəkkül, Əhli-beytə (ə) isə təvəssül etməyin zəruriliyi
Ekspertlər Məclisinin Rəyasət Heyətinin üzvü vurğulayıb ki, İslam İnqilabının Ali Məqamlı Rəhbəri Ayətullah Seyid Müctəba Xamenei Əhli-beytə (ə) təvəssülün əhəmiyyətini xüsusi olaraq qeyd etməsi təsadüfi deyil. Bunun əsas səbəbi məsum imamların (ə) ilahi nemət və mərhəmətin insanlara çatdırılmasında vasitəçi rolunu oynamasıdır.
Bu baxımdan, bizə çatan hər bir xeyir, o cümlədən ilahi yardım və uğurlar Allahın izni ilə Əhli-beytin (ə) vasitəsilə çatır.
O bildirib ki, bu həqiqət gerçəkləşdikdə hadisələrin gedişatını tamamilə fərqli müstəvidə dərk edirik. Bir tərəfdə Allah-Taalanın və Əhli-beytin (ə) məğlubedilməz qüdrəti, digər tərəfdə isə müstəqil təsir gücünə malik olmayan maddi amillər dayanır. Məhz bu baxımdan, Allah varlığın ən böyük qüdrəti olduğu kimi belə bir ilahi qüdrətə arxalanan möminlər də dünyanın birinci gücü adını qazanırlar.
İran xalqı hansı amillərin sayəsində güclü mövqeyə sahib olub?
Elmi Hövzələrin Ali Şurasının üzvü xatırladıb ki, İran xalqı İslam Respublikası quruluşunun bərqərar olması və vəliyyi-fəqihin rəhbərliyinə tabeçilik sayəsində belə bir qüdrətə sahibdir. Bu gün xalqımızın dünyanın aparıcı güclərindən birinə çevrildiyinin şahidi oluruq. Bunun bariz nümunəsi son müharibə zamanı baş verən hadisələrdir. Belə ki, nüvə silahına malik iki dövlət bir sıra digər ölkələrin dəstəyi ilə ölkəmizə gizli və dolayı yollarla hücum etmiş, lakin Allah-Taalanın lütfü və İran xalqının qətiyyətli mübarizəsi sayəsində sarsıdıcı məğlubiyyətə uğramışdır.
Dünyanın etiraf etdiyi danılmaz həqiqət
İmam Xomeyni (r) adına Təlim və Tədqiqat İnstitutunun direktoru bir daha vurğulayıb ki, bu gün dünya son hərbi qarşıdurmada qələbənin İran İslam Respublikası quruluşuna və İran xalqına məxsus olduğunu etiraf edir.
Rəsmilər hesablamalardakı səhvlərə yol verməməlidirlər
Ayətullah Rəcəbi sonda bildirib ki, bu mühüm məqam rəsmilər üçün də ciddi əhəmiyyət daşıyır. Belə ki, onlar qərarların qəbulunda və hadisələrin qiymətləndirilməsində hesablama səhvlərinə yol verməməyə xüsusi diqqət yetirməlidirlər. Bu səhvlərdən biri müxtəlif hadisə və prosesləri yalnız məhdud maddi amillər əsasında təhlil etməkdir. Buna görə də rəsmilər ilahi inayəti və Allahın qüdrətini heç bir şəraitdə nəzərdən qaçırmamalıdırlar.
Xəbərin sonu
Rəyiniz